Vijojnë argumentet e mbrojtjes së Selimit në Hagë

Avokati i Rexhep Selimit, Eric Tully, ka deklaruar se Zyra e Prokurorisë së Specializuar nuk ka treguar qartë se kush është autori i materialeve që përdori për akuzat ndaj Selimit.

Tully ka përmendur një fotografi të prezantuar nga ZPS, ku Selimi shihet i veshur me uniformë të zezë. Sipas tij, Prokuroria pretendoi se kjo tregonte se Selimi kishte ndryshuar pozitën e tij. Megjithatë, avokati thekson se nuk ka asnjë provë që ky ndryshim uniforme të ketë pasur lidhje me ndonjë ndryshim detyre.

“Pjesa tjetër e provave të ZPS-së për lidhjen e Selimit me policinë përbëhet nga disa fotografi ku Selimi shihet i veshur me uniformë të zezë. Prokuroria tha se të paktën në qershor 1999, Selimi kishte ndryshuar uniformën e vet në të zezë dhe spekuloi se kjo tregonte një ndryshim në detyrat dhe përgjegjësitë e tij. Megjithatë, Prokuroria nuk ka vërtetuar se vetëm fakti që dikush vesh një uniformë të zezë apo ndonjë uniformë tjetër është tregues që personi i përket policisë ushtarake. Kjo mund të jetë e vërtetë për një polici apo ushtri si UÇK-ja, që nuk kishte rregulla strikte për uniformat”, tha Tully.

Avokati mbrojtës i Rexhep Selimit ka kundërshtuar pretendimin e Zyra e Prokurorit të Specializuar se klienti i tij, në cilësinë e ministrit të Rendit Publik, ka pasur kontroll mbi një strukturë të ashtuquajtur “Policia e UÇK-së”.

Sipas tij, Prokuroria nuk ka arritur t’i provojë këto pretendime para trupit gjykues.

Avokati theksoi se termi “Policia e Ushtrisë Çlirimtare të Kosovës (UÇK)” është një konstrukt i ngritur nga Prokuroria, për të përfshirë sa më shumë prova dhe për të krijuar përshtypjen se ekzistonte një strukturë e organizuar policore, e cila drejtohej nga Selimi si ministër i Rendit Publik.

Ai argumentoi se pas qershorit, UÇK-ja dhe policia ushtarake e saj kanë qenë nën përgjegjësinë e komandantëve të zonave dhe jo nën autoritetin e Selimit. Sipas mbrojtjes, nuk ka ekzistuar një polici e veçantë e UÇK-së apo e Ministrisë së Rendit Publik që të jetë mbikëqyrur nga Selimi, ashtu siç pretendon Prokuroria.

Po ashtu, avokati shtoi se në prill të vitit 1999, duke pasur parasysh rrethanat e luftës, nuk kishte asnjë forcë policore të krijuar dhe se nuk ekziston asnjë provë e besueshme nga dëshmitarët apo nga Prokuroria që e mbështet një pretendim të tillë.

Avokati i Rexhep Selimit, Eric Tully, ka paralajmëruar se gjatë ditës do t’i trajtojë tri tema në emër të klientit të tij: pretendimet e Zyrës së Prokurorit të Specializuar për rolin e Selimit si ministër i Rendit Publik, pretendimet për disa shkrime dore që pretendohet të jenë bërë prej Selimit, dhe më pas për disa përjashtime që mbulon ZPS-ja në dosjen e saj.

Sot vijon dita e pestë e deklaratave përmbyllëse në procesin gjyqësor ndaj ish-eprorëve të Ushtrisë Çlirimtare të Kosovës, që po zhvillohet në Dhomat e Specializuara të Kosovës me seli në Hagë.

Një ditë më parë deklaratat përmbyllëse i vazhdoi mbrojtja e Kadri Veselit, përmes avokatit Rodney Dixon, dhe më pas nisi paraqitjen mbrojtja e Rexhep Selimit, e përfaqësuar nga Geoffrey Roberts.

Ndërkohë të mërkurën fjalën e kishte mbrojtja e ish-presidentit Hashim Thaçi, ndërsa më herët gjatë javës deklaratat përmbyllëse i kishin paraqitur Prokuroria dhe mbrojtësit e viktimave.

Gjatë ditës pritet përmbyllja e deklaratës së trupit mbrojtës së Rexhep Selimit, për të vazhduar më pastaj me deklaratën përmbyllëse të trupit mbrojtës së Jakup Krasniqit.

Përmes këtij blogu do të raportojmë në kohë reale mbi zhvillimet kryesore dhe deklaratat më të rëndësishme nga salla e gjyqit.

Faleminderit që po na ndiqni.